Imanol Lartzabal zenaren omenez, horma irudi bat inauguratu zuten atzo Donostiako Bentaberri plazan, kantaria jaio zen lekutik gertu eta sortu zeneko 70. urteurrenean. Mikel Herrero artistak ondu du murala; kantuan ageri da Imanol, eta irudiaren alboan, «Zoaz urruti airean... lau haizetara» esaldia irakur daiteke. Imanol Oroituz kolektiboaren ekimenez egin dute horma irudia, udalaren babesarekin. Eguerdian eginiko ekitaldian izan ziren, besteak beste, Eneko Goia Donostiako alkatea, Xabier Euskitze bertsolaria, Amaia Zubiria kantaria eta Karlos Jimenez pianista.
↧